மயங்காதே மனமே- தென்கச்சி கோ சுவாமிநாதன்

✍️

மயங்காதே மனமே - தென்கச்சி கோ சுவாமிநாதன்

‘என்னை எவரும் அசைக்க முடியாது’ என்று சவால் விடும் மனிதர்கள் ஏராளம்! ஆனால், இவர்களின் நிலை இறுதிவரை இப்படியே இருக்குமா??

‘நம்மை, வேறு எவரோ ஒருவர் அசைத்துக்கொண்டு இருக்கிறார்!’ என்று எண்ணச் சொல்கிறது ஆன்மிகம். இந்த எண்ணமே அகந்தையைக் குறைக்க உதவுகிறது.

 ஷ்மெல்னோ என்ற யூத மத குரு ஒருவர், அந்த ஊருக்கு வந்தார். இதையறிந்த ஊர் மக்கள் ஒன்று கூடினர்.

 "நம்ம ஊருக்குப் புதுசா வந்திருக்கிற அந்த குருவை வரவேற்கணும். என்ன செய்யலாம்?" என்று கேட்டார் ஒருவர். 

"இன்று மாலை, அவருக்குப் பாராட்டு விழா நடத்துவோம்" என்றார் மற்றொருவர். 

அனைவரும் ஒப்புக்கொண்டனர். இதையடுத்து, குருவை நேரில் சந்தித்து தங்களது விருப்பத்தைத் தெரிவித்தனர். அவரும் சம்மதித்தார். 

அவ்வளவுதான்! அனைவரும் உற்சாகத்துடன் விழா ஏற்பாடுகளை கவனிக்க ஆரம்பித்தனர். அதே நேரம், அந்த குரு, ஓர் அறைக்குள் நுழைந்து கதவைச் சாத்திக்கொண்டார். 

சிலர், அவருக்காக வெளியே காத்திருந்தனர். அறைக்குள் இருந்து ஏதேதோ சத்தம் வந்துகொண்டு இருந்தது! 

குரு, தனக்குத் தானே ஏதோ பேசுவது போல் இருந்தது. ஆனால், தெளிவாக யூகிக்க முடியவில்லை. ‘விழாவில் பேசவேண்டிய கருத்துகள் குறித்து ஒத்திகை பார்க்கிறார் போலும்’ என்பது சிலரது கருத்து. 

இன்னும் சிலரோ, "பேசிப் பழகுவதற்கு அவர் என்ன பள்ளி மாணவரா?" என்று கேள்வி கேட்டனர். 

சிறிது நேரத்தில், அறைக் கதவு திறந்தது. குரு வெளியே வந்தார். அனைவரும் அவரருகே வந்தனர்.

 "ஐயா! அறைக்குள் எதையோ திரும்பத் திரும்பச் சொல்லிக் கொண்டிருந்தீர்களே, அதற்கு என்ன அர்த்தம்?" என்று கேட்டனர். 

அவர் சிரித்துக்கொண்டே சொன்னார்: "ஒன்றும் இல்லை. விழாவில், ‘இந்திரனே... சந்திரனே!’ என்றெல்லாம் என்னைப் புகழ்வீர்கள். இந்த வார்த்தைகளைக் கேட்டதும், எனக்கு அகந்தை வந்துவிடும். ஆகவே, இது போன்ற வார்த்தைகளை எனக்கு நானே பல முறை சொல்லிப் பார்த்துக்கொண்டேன். இப்போது, இந்த வார்த்தைகள் எனக்குப் பழகி விட்டதால், விழாவில் நீங்கள் புகழ்ந்து பேசினாலும் எனக்கு கர்வம் ஏற்படாது அல்லவா?!"

 புகழ்ச்சியால் மனம் மயங்கும் நேரத்தில், ‘அகந்தை’ எனும் விருந்தாளி நாம் அழைக்காமலேயே உள்ளே வரக் கூடும். ஆகவே, எச்சரிக்கை தேவை. 

எலும்பு முறிவு ஆஸ்பத்திரியில் ஒருவர் படுத்துக் கிடந்தார். 

என்னாயிற்று அவருக்கு? ‘என்னை எவரும் அசைக்க முடியாது’ என்று சொல்லிக் கொண்டிருந்த அவரை, தரையில் கிடந்த வாழைப் பழத் தோல் ஒன்று அசைத்து விட்டதாம். 

இனி, அவர் அசைவதற்கு எவ்வளவு நாள் ஆகுமோ, யாருக்குத் தெரியும்?

மனமே மயங்கிவிடாதே.. அதுவே உன்னை சாய்த்துவிடும்...